طريقتي في استخدام الزيوت للبشرة

طريقتي في استخدام الزيوت للبشرة

موضوعي النهاردة عن استخدامي للزيوت للبشرة 

الموضوع مش جديد انا سبق و نزلته في بوست على الفيس في ديسمبر 2015

السبب اني بنزله تاني النهاردة على المدونة اني ناوية انزل جزء تاني للموضوع قريب بزيوت جديدة 

في اخر موضوعي هحط لينك البوست اللي نزلته على الفيس ....ياريت متستغربوش من الاسئلة اللي في الكومنتس لان وقت اما نزلت البوست ده مكنش اي حد يعرف زيت الروزهيب و لا بذورالعنب و لا فيتامين e اويل

هحاول على اد ما اقدر اني اخلي الموضوع بسيط 

 انا استخدمت أنواع مختلفة من الزيوت للبشرة بس فيه زيت بيمر عليكي مرور الكرام و فيه زيت تاني بتحسي انه فعلا فرق و يستاهل انك ترجعي تشتريه تاني ....هي ديه الزيوت اللي هرجع اشتريها تاني 👇

1_ grapeseed oil (زيت بذور العنب )

يحتوي على 

فيتامين e ( مضاد اكسدة و يساعد على تجديد البشرة)

فيتامين c ( يفتح البشرة و يوحدها و يحفز إنتاج الكولاجين و طبعا مضاد للأكسدة )

فيتامين dd ( يصلح خلايا البشرة و يساعد على إنتاج الكولاجين و يقلل الخطوط التعبيرية و البقع البنية و ينعم البشرة)

غني ب beta_carotene ده شكل من أشكال فيتامين aa (يساعد على اختراق طبقات أعمق من البشرة مما يجعل البشرة تحتفظ بالترطيب )

أحماض دهنية palmilic acid و streaic acid و linoleic acidd (يدعموا صحة البشرة و كلهم مضادات لعلامات تقدم العمر )

غني ب polyphenols ( مضادات للأكسدة و مضادات للالتهابات )

فوائد زيت بذور العنب 

معالج للحبوب و لآثار الحبوب سواء بقع أو ندوب

مرطب ممتاز لأنه زيت خفيف سهل الامتصاص يخترق البشرة بسرعة 

 يشد البشرة لأن ليه خواص قابضة للمسام بمعنى أنه يقبض المسام دون أن يسدها و بالتالي يقلل من البثور السوداء 

يخفف من الهالات 

يحارب علامات تقدم العمر و يقلل الخطوط التعبيرية و التجاعيد و يعطي للجلد مرونة و نعومة

أنواع البشرة المناسبة لاستخدام زيت بذور العنب 

مناسب لجميع انواع البشرة خصوصا البشرة الحساسة و المعرضة للحبوب و البشرة المصابة ب الحبوب 

طريقتي في استخدامه 

باخد كام نقطة و ادلكهم بين ايديه و بعدين اعمل مساج خفيف للبشرة و بستخدمه مرة واحدة في نص اليوم كترطيب للبشرة و بالنسبة لمنطقة العين نقطة على صباع الدبلة و بطريقة الطبطبة بعكس اتجاه التجاعيد على عضمة الخد وعضمة الحاجب يعني على عضمة الحاجب من جوه لبره و عضمة الخد من بره لجوه بطريقة دائرية 

ملاحظتي من استخدامه 

نضارة لطيفة للبشرة تفتيح للبشرة و تقليل البثور السوداء و تفتيح في الهالات 

ايه اللي يميز الزيت ده عن أي زيت تاني

انك ممكن تستخدميه في وقت حتى لو عندك حبوب ده بالعكس هيساعدك على علاجها 

متوفر براندات مختلفة من زيت بذور العنب في مصر

النوع بتاعي سعره 1400 ج تقريبا و بيتباع نفس النوع في الصيدليات بس بسعر أعلى و مش فاكرة أسماء الصيدليات

2_ Rosehip oil 

مبدأيا زيت الروز هيب مش هو زيت الورد 

ده زيت ب يستخرج من نبات موجود في آسيا و شمال أفريقيا و اروبا 

يحتوي على 

الأحماض الدهنية الأساسية اوميجا 3 و 6 و 9 ( تساعد على إصلاح أنسجة البشرة )

غني بفيتامين c 

فيتامين e

غني ب B _ carotene 

فوائد زيت الروز هيب

زيت الروز هيب زيت جاف بمعنى أنه خفيف يمتص بسرعة ليه القدرة على اختراق الطبقات العميقة من الجلد لاحتوائه على فيتامين a 

مضاد لعلامات تقدم العمر 

لاحتوائه على مضادات الأكسدة 

و احتوائه على فيتامين c يحفز إنتاج الكولاجين مما يساعد على تقليل الخطوط التعبيرية و التجاعيد 

معالج للندوب لاحتوائه على الأحماض الدهنية اللي بتساعد على إصلاح الأنسجة 

معالج لاضرار التعرض للشمس سواء بقع تجاعيد عدم توحيد لون 

خبراء التجميل بيقولوا عليه أفضل من البوتوكس

أنواع البشرة المناسبة لاستخدام زيت الروز هيب 

جميع انواع البشرة خصوصا البشرة الجافة و لا يصلح لأصحاب البشرة الحساسة 

طريقتي في استخدامه 

بحب استخدمه بطريقتين 

الطريقة الأولى 

 اني اعمل تدليك خفيف على بشرتي بعد استخدام الكريم الليلي 

الطريقة التانية 

أما بيكون عندي مرطب رخيص زي ال بانثينول أو البيبانتين 

 باخد الكمية اللي بستخدمها من الكريم و احط عليها نقطة واحدة من زيت الروز هيب و نقطة من زيت فيتامين e و استخدمهم كمرطب و بصراحة بيعمل معاية أحلى شغل من حيث النضارة و التفتيح 

ملاحظتي من استخدامه 

بشرة مشدودة و نضارة عالية

ايه اللي يميز زيت الروز هيب عن أنواع الزيوت التانية 

 انه غني بفيتامين سي يعني لو فعلا عندك مشكلة حقيقية في النضارة أو التجاعيد توكلي على الله و استخدميه و ادعيلي 

ملحوظة مهمة 

زيت الروز هيب ريحته مش حلوة تميل لرائحة السمك الني معلش الحلو ميكملش

نقطة كمان زيت الروز هيب لونه ما بين الأصفر إلى  اللون البرتقالي بيختلف على حسب اختلاف الزهرة المعصور منها 

نقطة كمان النوع بتاعي اسمه now solutions هو نوع كويس لكن مش أفضل الأنواع 

سعره كان 655 ج و طبعا بيتباع اون لاين

3_ vitamin e oil ( زيت فيتامين ه )

طبعا مغذي للبشرة و مضاد للاكسدة 

فوائد زيت فيتامين e 

يمنع ظهور التجاعيد و يعالجها بأنه بيزيد من إنتاج الكولاجين و الايلاستين (نوع من أنواع البروتين) يساعد على تجديد خلايا البشرة 

 يساعد على علاج التصبغات ( التصبغات بتظهر اصلا بسبب تقدم العمر و حدوث خلل في الخلايا ) فيتامين e بيساعد على إصلاح الخلل اللي بيحدث في الخلايا و بالتالي بيفتح و ينعم البشرة 

ينعم البشرة 

 لأنه بيمد البشرة بالترطيب اللازم لكن غير صالح للترطيب اليومي لأنه تقيل جدا على البشرة فممكن يسبب حبوب 

معالج للندوب خاصة الناتجة عن الحبوب 

 معالج للهالات السوداء لأنه بيمنع تكون الميلانين و بيقوي المنطقة اللي حول العين و يجعل الجلد اسمك 

انواع البشرة المناسبة لاستخدام زيت فيتامين e 

أجمع أنواع البشرة ماعدا البشرة الدهنية

طريقتي في استخدام زيت فيتامين e

الطريقة الاولى 

انا تقريبا الكريم الليلي بيقدر معاية شهرين 

بعد أما يخلص الكريم الليلي بستخدم زيت فيتامين e كمرطب ليلي لمدة أسبوع 

بمعنى اني كل شهرين بستخدم زيت فيتامين e كمرطب ليلا على بشرة نضيفة لمدة اسبوع

الطريقة التانية 

اني بضيف نقطة من زيت فيتامين e و نقطة من زيت الروز هيب و استخدمهم كمرطب 

الطريقة التالتة 

أثناء و انا بعمل تقشير لأنه بيساعد على سرعة تجديد البشرة 

ملاحظتي من استخدام زيت فيتامين e 

فعلا فيه حكاية عشق بيني و بين الزيت ده بستخدمه من 4 سنين 

الأول كنت بجيب كبسولات فيتامين ee بس المستوردة و نفس الطريقة كل شهرين لمدة اسبوع أخد كل يوم قبل النوم كبسولة و افتح ها و استخدمها على بشرتي و رقبتي و شفايفي و بطريقة الطبطبة على عضمة الخد و الحاجب 

 كنت أما بعمل كده على خامس يوم لازم الكل يسألني انتي حاطة ايه على بشرتك و طبعا مش بكون حاطة حاجة النضارة فظيعة بجد

من قريب جبت الزيت عجبني اكتر لأنه أخف من الكبسولات و تركيزه أعلى 

أما بنسى استخدم الزيت ده بشرتي بتختلف تماما عشان كده مش بقدر استغنى عنه 

معلومة على الماشي 

عشان تاخدي أعلى فايدة من فيتامين e ضيفيله فيتامين c 

عشان كده بحب أضيف زيت الروز هيب لزيت فيتامين e 

لو عايزة مصدر طبيعي لفيتامين e يبقى زيت جنين القمح فيه أعلى نسبة من فيتامين e 

زيت فيتامين e موجود في الصيدليات و على موقع سوق.كوم و النوع بتاعي كنت جيباه ب 700 ج

دول فعلا اكتر 3 أنواع زيوت فرقوا معاية جدا 

 بس لاني بحب زيت الجوجوبا و بحس انه قريب اوي من زيت بذور العنب هضيفه لمجموعة الزيوت اللي بتعجبني 

4_jojoba oil (زيت الجوجوبا )

يحتوي على 

فيتامين a

فيتامين e

فيتامين B _ complex 

معادن copper, zinc , selenium, iodine, chromium 

زيت الجوجوبا هو أكثر الزيوت تشابه لل (human sebumm) السيبم مادة زيتية تنتج طبيعيا من الغدد الزيتية الموجودة تحت سطح الجلد ليها فوائد مهمة للبشرة و الشعر 

فوائد زيت الجوجوبا 

بما أن زيت الجوجوبا بيحتوي على معظم المعادن و الفيتامينات اللي بتحتاجها البشرة فهو 

مرطب عميق للبشرة 

مضاد للبكتيريا و مضاد للالتهابات لاحتوائه على ال iodinee مما يقلل ظهور الحبوب و الرؤوس السوداء 

يساعد على نضارة البشرة و إنتاج الكولاجين 

بيشد البشرة و يقلل ظهور التجاعيد 

 يتحكم في إفراز الدهون (النقطة ديه مهمة جدا ) الدهون اللي بتفرزها البشرة هي نفسها السيبم اللي قولنا عليه من شوية أنه مفيد للبشرة على الرغم أن السيبم مفيد للبشرة إلا أن زيادة افرازه بيؤدي إلى أن انسداد المسام و بالتالي هيؤدي إلى انتشار الحبوب و البثور السوداء 

أنواع البشرة المناسبة لاستخدام زيت الجوجوبا 

جميع انواع البشرة خاصة البشرة الدهنية 

طريقتي في استخدام زيت الجوجوبا 

بدفي معلقة زيت في حمام ماية ساخنة و اعمل مساج عميق للبشرة و بستخدمه كماسك ليلي ترطيب عميق للبشرة انام بيه و الحكاية ديه بعملها مرة واحدة في الاسبوع

ملاحظتي من استخدامه 

نفس ملاحظتي لزيت بذور العنب 

ايه اللي يميز زيت الجوجوبا عن أي نوع زيت تاني 

 انك و انتي بتستخدميه مش بتحسي انك محملة بشرتك بزيت تقيل بالعكس خفيف جدا

**طيب لو إنتي عندك كريم مرطب و سيرم و زيت و متقدريش تستغني عنهم ازاي ترتبي استخدامهم على بشرتك 

أولا ابدأي بأخف منتج فيهم و هو السيرم بيكون بعد التوتر مباشرة 

 ثانيا استخدمي المرطب ليه تستخدمي المرطب قبل الزيت لأن المرطب غالبا بتكون القاعدة بتاعته مائية يعني جزيئاته أصغر من جزيئات الزيت يبقى لازم تستخدميه قبل الزيت 

ثالثا استخدمي الزيت 

  حطي دايما في دماغك أن الزيت ليه القدرة انه يخترق الكريم لكن الكريم ملوش القدرة انه يخترق الزيت 

ملحوظة 

ماتحوليش تحملي بشرتك بأكثر من 3 منتجات 

فيه حاجة أخيرة عايزة اتكلم معاكم فيها 

 انا عارفة أن فيه ناس منكم هتعلق أو حتى هتقول بينها و بين نفسها انتوا بتستخدموا ايه و لا ايه لبشرتكم 

عايزة ارد عليكم و اقولكم لو إنتي في العشرينات اكيد ب تسعي لبشرة صافية نضرة 

لكن لو إنتي في التلاتينات خصوصا لو عديتي ال 355 سنة بتحسي انك بتمشي عكس الزمن بمعنى أن كل يوم بيعدي عليكي بيبدأ يظهر عليكي علامات تقدم السن كل اللي انا أو غيري بيحاول يعمله أننا بنحاول على اد ما نقدر أننا نأخر العلامات ديه على اد ما نقدر 

ديه طريقتي اما بستخدم اي نوع زيت بشكل يومي

1_ اخد من نقطتين الى 3 نقط في ايدي

2_ادلكهم بين ايديه عشان الاويل يسخن شوية و يخترق البشرة بشكل اسرع

3_بأطراف اصابعي ابدأ اضغط بسيط على بشرتي بالشكل ده 

4_مساج بسيط اوي

طريقتي في استخدام الزيوت بشكل اسبوعي

بيكون على هيئة مساج و بحب دايما اعمله قبل النوم وانام بيه و بيبقى الاويل بالنسبة ليه ماسك تغذية للبشرة

بالنسبة للرقبة بستخدم الطريقة ديه

 كل سنة و انتوا طيبين جميعا

كل الزيوت اللي فاتت ليها فوائد للشعر و الجسم بس انا مذكرتهاش لأن الموضوع مخصص للبشرة مش لأي حاجة تانية و كمان عشان يبقى فيه تركيز اكتر

طبعا اي سؤال انا معاكم 

ده لينك البوست على الفيس بوك

https://www.facebook.com/groups/221451111399059/permalink/449251768618991/