تقصف الشعر Hair Damage PART 1

تقصف الشعر

Hair Damage

السلام عليكم و رحمة الله و بركاته

ازيكم يا بنات 

حبيت اني اول مشاركة ليه في المدونة يكون اقرب المواضيع الى قلبي واكتر المواضيع اللي بحب اني اتكلم عنها و بجد متعة في مناقشتها موضوعي عن تقصف الشعر
الاسباب اللي خلتني ابدأ بالموضوع ده تحديدا

1- اني بشوف مواضيع كتير مستفزة زي مثلا أن س تنزل ريفيو عن منتج معين و تقول ده تحفة ده قضى على التقصف نهائي و بعدها تلاقي باقي البنات تنزل جري تشتري المنتج على أمل انه يحل مشكلة التقصف عندها فتلاقي مع ناس جاب نتيجة كويسة و مع ناس تانية زود المشكلة هو مين قال إن لو س و ص عندها مشكلة تقصف أن سبب المشكلة واحد و حتى لو نفرض جدلا أن سبب المشكلة واحد مين قال إن المنتج اللي هينفع مع س هو اللي هينفع مع ص ما يمكن عند س المشكلة متطورة و محتاجة منتج قوي و عند ص تحتاج منتج تاني يجيب معاها نتيجة من أول أو تاني استخدام .
........................................
موضوع تقصف الشعر
بصراحة تقصف الشعر مش هينفع أنزله كله مرة واحدة ﻻزم الأول تفهمي ايه أسباب التقصف و بعدين تعرفي المنتجات اللي ممكن تناسب المشكلة بتاعتك و هتكلم عن تجربتي مع التقصف و ازاي شعري مر ب3 مراحل مختلفة

اوﻻ ﻻزم تعرفي الشعر بيتكون من ايه 

الشعر بيتكون أساسا من بروتين و ماية أو الرطوبة ( كلمة ماية مش صح علميا بس خلينا نستخدمها لحد اما نفهم الموضوع كويس)
نسبة البروتين في شعرنا بتمثل تقريبا 70%
البروتين و الماية بيشتغلوا مع بعض عشان يدونا شعر صحي
يبقى احنا ﻻزم نحافظ على كمية البروتين ديه و كمية الماية عشان الشعر يفضل صحي
الماية أو الرطوبة دورها أنها تدي للشعر المرونة و القدرة اني اشكله
طيب لو فقدنا الماية اللي في الشعر ايه اللي هيحصل ؟؟
الشعر هيكون جاف و هيتكسر
فايدة البروتين انه بيدي للشعر القوة و البنية أو الشكل بتاعه
طيب لو نسبة البروتين قلت في الشعر ايه اللي هيحصل ؟؟
الشعر هيكون ضعيف و هيبقى مرن جدا و يمط بسهولة ﻻن طبقات الغلاف الخارجي هتكون مفتوحة
و هقولكم مثال بسيط شوفته في فيديو
هاتي مكرونة اسباجتي لسه متسلقتش يعني مفيهاش أي رطوبة أو ماية و اتنيها المكرونة هتتكسر و ده حال الشعر اللي فاقد الترطيب
طيب هاتي مكرونة اسباجتي و اسلقيها كويس اوي يعني معنى كده انها مشربة تماما ب الماية و شديها من الطرفين هتلقيها اتشدت زي اللبانة و بعدين اتقطعت و ده حال الشعر أما يكون نسبة الرطوبة فيه كتير
طيب هاتي مكرونة اسباجتي و اسلقيها مش جامد و شديها من الطرفين هتلقيها مطت شوية و بعدين رجعت ل طولها العادي و هو ده المفروض يكون الشعر الصحي
.....................................................
خلاصة الكلام ده ايه ...............
- لو الشعر قل فيه الترطيب بيبقى نسبة البروتين فيه عالية فهيبقى قوي زيادة عن اللزوم و هيفقد مرونته فهيتكسر
- لو الشعر زاد فيه الترطيب اكتر من اللازم هتبقى نسبة البروتين فيه قليلة يعني فاقد لقوته و مرن اكتر من اللازم فأي تسريح بسيط هيشد الشعر فهيكسر طبقاته الخارجية و هيتقطع
و هو ده يا جماعة تقصف الشعر
يبقى أي واحدة فينا عندها تقصف تفهم أن مشكلتها حلها في حاجة من الاتنين يأما محتاجة ترطيب يأما محتاجة بروتين 

اول سؤال هنبدأ نسأله لنفسنا
👈امتى اعرف ان مشكلة التقصف عندي سببها نقص البروتين أو اني محتاجة بروتين في روتين الشعر بتاعي ؟؟؟؟
المقصود بكلمة بروتين هنا منتجات تحتوي على البروتين زي الشامبو أو الكونديشنر أو الليف أن أو ماسك الشعر
هتحتاجي بروتين...
1_ بتصبغي شعرك أو بتفرديه
2 _ بتستخدمي البيبي ليس أو السيشوار حتى مع استخدام واقي من الحرارة
3_ ممكن يكون احتياجك للروتين وراثة
4 _ شعرك ضعيف هش بيتقطع بسهولة أثناء التسريح أو الشور
5 _ شعرك باهت و بيمط أثناء التسريح
6_ الشعر المتقطع لقيتيه رفيع من طرف عن طرف التاني
7 _ لو الشعر المتقطع لقيتي فيه تعريج من طرف
8 _ لو الشعرة رفيعة جدا اكتر من اللازم
9_لو الشعر بيتبل بسرعة و بينشف بسرعة
👈امتى اعرف ان مشكلة التقصف عندي سببها نقص في الترطيب أو اني محتاجة ترطيب ؟؟؟
1 _ الشعر جاف و خشن و ب يتكسر سواء جاف أو مبلل
2 _ الشعر المتقطع على هيئة قطع مستقيمة في الغالب و بيكون سمك الشعرة من الطرفين واحد
3_بتسمعي صوت طقطقة أثناء تسريح الشعر
4_ الشعر مش بيتبل بسهولة
طبعا كل الملاحظات اللي فوق ديه جبتها من المواضيع اللي قريتها و فيه حاجات زيادة ﻻحظتها بنفسي ﻻني زي ما قولتلكم مريت بالمشكلتين
طيب دلوقتي انتي شاكة أن التقصف عندك سببه حاجة معينة و عايزة تتأكدي
أو أنك متلخبطة و مش قادرة تحددي انتي إيه سبب التقصف عندك تعملي ايه
فيه اختبار ممكن تعمليه عشان تحددي انتي إيه سبب المشكلة عندك و مدى احتياجك للبروتين أو الترطيب في الروتين بتاعك
الاختبار اسمه wet assessment
الاختبار ده اسمه wet لأنه بيتعمل و الشعر مبلل ﻻن احسن طريقة لتقييم صحة الشعر و هو رطب أو مبلل ﻻن الشعر و هو مبلل بيبان مدى قوته و مرونته
الشعر الصحي بيكون ناعم و ﻻمع و كمان قوي و هو مبلل
طريقة الاختبار
هتاخدي كام شعراية من اللي بيقعوا أثناء غسل الشعر و هتبدأي تشديهم من الطرفين
النتيجة
1_ لو الشعر جاف أو مبلل اتمدد و بعدين رجع لطوله العادي من غير ما يتقطع اعرفي أن شعرك صحي
2_لو الشعر جاف أو رطب اتمدد شوية بسيطة و بعدين اتقطع يبقى انتي محتاجة تزودي شوية البروتين في الروتين بتاعك
3 _ لو الشعر جاف أو رطب اتمدد جامد و متقطعش يبقى محتاجة بروتين اكتر في الروتين بتاعك
4_لو الشعر و هو مبلل شكله ضعيف و معرج و طري اوي يبقى محتاجة نسبة بروتين أعلى في الروتين
5_ لو الشعر جاف أو مبلل تمدد بسيط أو مش اتمدد و اتكسر على طول يبقى محتاجة تزودي الترطيب في البروتين بتاعك
6_لو الشعر جاف او مبلل و ﻻحظتي انه خشن جاف يبقى محتاجة ترطيب اكتر في الروتين بتاعك
وبسسسس كده هو ده اللي المفروض تلاحظيه من الاختبار
طيب لو بعد ده كله لسه مش متأكدة ايه سبب التقصف عندك هتعملي ايه
في الحالة ديه الأفضل انك تبدأي تزودي في الترطيب ﻻن لو الشعر سبب التقصف فيه ترطيب بياخد وقت لحد اما يوصل للمرونة المطلوبة لكن نقص البروتين بيعالج بسهولة ممكن من استخدام أو اتنين ل ماسك بروتين مثلا
انا حاسة ان ممكن تكون صعبة فهم النقطة ديه
ببساطة مين مشكلته ممكن تتحل اسرع اللي عنده نقص بروتين وﻻ اللي عنده نقص ترطيب؟ ؟؟
اللي عنده نقص بروتين مشكلته بتتحل أسرع ممكن في خلال مدة بسيطة على حسب عمق المشكلة عنده
يعني لو مشكلة التقصف عندك أنك محتاجة ترطيب و روحتي ضايفة بروتين للروتين بتاعك كده هتكوني ضاعفتي المشكلة عندك في وقت قياسي
إنما لو المشكلة عندك انك محتاجة بروتين و ضيفتي ترطيب للروتين بتاعك اللي هيحصل أن المشكلة مش هتزيد بسرعة ﻻن الشعر بياخد وقت عشان يوصل لدرجة الترطيب أو المرونة المطلوبة
ساعتها هتلاحظي أن الترطيب مش جايب نتيجة و هتبدأي تغيري
طيب ازاي اعرف ان المنتج ده فيه بروتين وﻻ ترطيب الموضوع ده هتكلم فيه في بوست تاني لكن عامة هقولكم على خطوط عريضة تمشي عليها مبدأيا
لو المنتج ده فيه بروتين هتلاقي مكتوب عليه كلمة من الكلمات ديه
Protein, keratin, college, reconstruction, for damage hair,for weak hair ,for brittle hair, repair, strength, fortifying
لو المنتج ده للترطيب هتلاقي عليه كلمة من الكلمات ديه
Nourishing, moisturizing, for dry hair , hydration
طبعا المرة الجاية هعرفكم ازاي حتى لو مش مكتوب عليه أي كلمة من اللي فوق اعرف من المكونات بتاعته
طيب فيه حد ممكن يدخل يشوف ماسك الشعر بتاعه و هتلاقي مكتوب عليه for damage and dry hair و هتسأل نفسها هو ده فيه بروتين وﻻ ترطيب
هرد عليكي و هقولك فيه مسكات للشعر بيبقى فيه فعلا مكونات للبروتين و كمان ترطيب طيب ليه ﻻن الشعر الضعيف أو اللي فيه بروتين قليل غلافه الخارجي مفتوح فزي أما بيمتص الرطوبة بسرعة بيفقدها بسرعة فعشان كده ب تلاقي ماسكات شغالة على معالجة الجانبين فقد البروتين و الترطيب
 عارفة أن الموضوع طويل شوية 
لوعندك اي استفسار اكتبيلي في التعليقات