تقصف الشعر Hair Damage PART 2

ده الجزء التاني من موضوع تقصف الشعر 

الجزء ده المفروض انه فيه العلاج 

احنا عرفنا من الجزء الأول أن التقصف بيكون ناتج يأما من قلة الترطيب (زيادة البروتين في الشعر )

أو بيكون ناتج من زيادة الترطيب (قلة البروتين في الشعر )

طبعا كل سبب و ليه طريقة علاج مختلفة عن التانية تماما 

بصراحة أنا احترت ابدأ بأيه الأول فقررت اني ابدأ بعلاج التقصف الناتج عن قلة الترطيب أو زيادة البروتين في الشعر 

قبل أما اقول الخطوات فيه كام نقطة ﻻزم كلنا نعرفها 

🌸🌸1_الاساس في الترطيب هو الماية مش أي حاجة تانية 

معنى كده أما أحب اختار مرطب ﻻزم يكون أول حاجة في مكوناته ماية 

🌸🌸2_هل الزيوت بترطب الشعر ؟

ﻷ الزيوت مش بترطب الشعر و لكن ب تساعد على ترطيب الشعر و بتغذيه ﻻنها بتحتوي على فيتامينات و مضادات الأكسدة و fatty acids و amino acids 

🌸🌸3_ليه أما بغسل شعري و ارطبه تاني أو تالت يوم بلاقي شعري جاف و مش ناعم زي اول يوم ؟

عشان انتي مستخدمتيش sealant

🌸🌸4_يعني ايه كلمة sealant ؟؟؟؟

ال sealant  عبارة عن زيت أو سيرم فايدته انه بيغلف الشعراية فبيخليها تحتفظ بالترطيب أكبر وقت ممكن بمعنى اصح بتعمل lock للترطيب

🌸🌸5_هل ممكن استخدم أي زيت ك sealant ؟؟

ممكن ... بس خليكي عارفة أن فيه زيوت بتخترق غلاف الشعر زي زيت ال جوزهند و النوع ده من الزيوت مش بيعمل تغليف كامل للشعر وفيه زيوت تانية بتغلف الشعر من غير ما تخترق غلاف الشعر زي زيت اللوز الحلو 

🌸🌸6_ ايه فايدة الزيوت للشعر طالما هي مش الأساس في الترطيب ؟؟

الزيوت بتغذي الشعر و بتعوض الشعر الزيوت الأساسية اللي فقدها أثناء غسله و اللي بيفقدها بسبب العوامل البيئية اللي حوالينا ، الزيوت كمان فايدته زي ما قولنا بتعمل حاجز على الشعر عشان تخلي الشعر يحتفظ بالترطيب 

🌸🌸7 _ هو السيرم مش بيرطب الشعر ؟؟

ﻷ مش بيرطب الشعر ﻻن مفيش من ضمن مكوناته ماية و لكن بيدي الإحساس بالنعومة و الإنسيابية عشان معظم مكوناته سيلكون 

🌸🌸8_يعني ايه clarifying shampoo أو purifying shampoo ؟؟

ده شامبو بيكون فيه كمية سلفات أو كبريتات كتيرة و فايدته انه بيخلص الشعر و فروة الرأس من أي رواسب عليها ... 

🌸🌸9_يعني ايه اصلا رواسب buildup ؟؟

المنتجات اللي بنستخدمها في التصفيف و الترطيب بتسيب رواسب على فروة الرأس زي ال سيلكون مقلا الشامبو العادي مش بيقدر يخلصنا منها عشان كده ﻻزم نعمل clarifying  كل فترة 

🌸🌸10_طيب ليه ﻻزم أتخلص من ال buildup أو الرواسب كل فترة ؟؟

عشان فروة الرأس و الشعر تستفيد من الزيوت و المغذيات اللي بستخدمها 

🌸🌸11_المفروض استخدم ال clarifying shampoo كل اد ايه ؟؟ 

مرة كل شهر تقريبا 

🌸🌸12_انا مش بحب استخدم الشامبو اللي فيه سلفات اعمل ايه ؟؟؟

ضيفي على الشامبو بتاعك كمية بسيطة من بيكربونات الصودا  (الكربوناتو) و دلكي بيها فروة رأسك و بعد كده استخدمي مخفف خل التفاح  (مخفف خل التفاح بيتكون من تلت كوب خل تفاح عليه تلتين كوب ماية )هيديكي نفس النتيجة تقريبا 

🌸🌸13_ انا بقلق من إضافة بيكربونات الصودا للشامبو فيه حل تاني ؟؟

ايوة فيه ... خدي معلقة من بيكربونات الصودا و حطي عليها مايه قليلة و ادعكي بيها فروة رأسك و بعدين استخدمي الشامبو بتاعك عادي و اشطفي شعرك بالنهاية ب مخفف خل التفاح 

🌸🌸14_ ازاي اختار المرطب بتاعي ؟؟؟

🌻ا_  بصي دايما على أول خمس مكونات من المرطب بتاعك ﻻن هي ديه المكونات الأعلى التركيز فيه 

🌻ب_ابعدي عن أي مرطب فيه mineral oil , parabens , petroleum 

🌻ج_  ابعدي عن الأنواع ديه من الكحول SD alcohol , propanol , ethanol , alcohol denat , propyl alcohol , isopropyl alcohol 

ﻻن الأنواع ديه من الكحول أما تيجي تتطاير بتاخد معاها الرطوبة اللي في الشعر و بتسيب الشعر جاف و بالتالي الشعر هيفقد مرونته عشان كده الأنواع ديه اسمها drying alcohols 

🌻د_ فيه أنواع من الكحول كويسة زي  cetyl alcohol , cetearyl alcohol ,  lauryl alcohol , myristyl alcohol , behenyl alcohol  propylene alcohol  الأنواع ديه بتفرديه الغلاف الخارجي للشعر اية و بتحسن من مظهر الشعر و ب تخلي الشعر يحتفظ بالترطيب

🌻ه_ أشهر المكونات المرطبة هي ال aloe Vera gel . . glycerin  Panthenol 

🌼🌼طبعا انا عارفة انكم زهقتوا مني و قاعدين تقولوا ما تخلصي بقى و تقولي العلاج 

انا قولت الكﻻم ده كله ﻻنك لو فهمتيه هتعرفي ازاي تعالجي شعرك و ديه أساسيات ﻻزم كلنا نعرفها  

اخيراااا ....👇👇👇👇

ازاي اعالج تقصف الشعر الناتج عن زيادة البروتين أو قلة الترطيب ؟؟؟ 

🌸1_ اعملي clarifying  لشعرك مرة كل شهر عشان تشيلي أي رواسب عليه أو على فروة الرأس

🌸2_ استخدمي ماسك مرطب (حمام كريم ) للشعر لمدة نص ساعة تقريبا مرة كل أسبوع مع استخدام الحرارة 

🌸3_ ضيفي للماسك ده معلقة زيت صغيرة زي زيت الارجان أو الزيتون

🌸4_ ركزي دايما على أطراف الشعر في الترطيب و زي ما عرفتي المرطب هيكون أساسه ماية مش أي حاجة تانية

🌸5_ابعدي مؤقتا الفترة ديه عن أي منتجات فيها بروتين

🌸6 _ رطبي شعرك كل يوم أو كل أما تحسي انه محتاج ترطيب 

🌸7_ استخدمي زيوت زي الجوجوبا أو الزيتون أو جوز الهند ك sealant  عشان تقدري تحتفظي بالترطيب أكبر فترة ممكنة 

متنسيش دايما تركزي على المنتجات اللي مكتوب عليها hydration أو for dry hair أو moisturizing 

بسسسس كده هو ده العلاج 

فترة العلاج بالنسبة للنوع ده من التقصف تقريبا أسابيع و ب تعتمد الفترة على مدى الضرر اللي في الشعر 

العلاج هيخلي الشعر يبطل يتكسر لكن مش هيعالج النهايات المقصفة عندك عشان كده ﻻزم كل فترة تقصي الأطراف 

سؤال مهم ﻻزم نسأله لنفسنا ....

🌹🌹ايه اللي المفروض اعمله بعد ما شعري يبطل يتقصف؟؟ 

الإجابة هي الموازنة ... الموازنة بين المنتجات اللي فيها ترطيب و المنتجات اللي فيها بروتين     

اسيبكم على خير و يا رب تكونوا استفدتوا و مكنش تقيلة على قلبكم و أكون قدرت اوصلكم المعلومة بسهولة

لو فيه اي استفسار سيبوا كومنت و لو عجبكم الجزء ده ياريت تعملوا شير