تقصف الشعر Hair Damage PART 3

لكل الناس اللي حاسة ان شعرها بيمط و بقى عامل زي الأستك اقرأوا الموضوع ده هيفيدكم

الجزء الثالث من موضوع تقصف الشعر 

الجزء ده بيتكلم عن التقصف الناتج عن نقص البروتين في الشعر

لو بتصبغي شعرك أو بتفرديه أو بتستخدمي البيبي ليس أو السيشوار بصفة مستمرة و عندك تقصف في الشعر أعرفي ان الجزء ده من موضوع التقصف هو اللي محتاجاه

طبعا ممكن تكوني مش بتعملي أي حاجة من اللي فاتت و عندك تقصف ناتج عن نقص البروتين 

خليكي عارفة ان النوع ده من التقصف طبقات الغلاف الخارجي من الشعر بتكون مفتوحة و بعضها مش موجود 

الشعر في الحالة ديه بيتبل بسرعة و بينشف بسرعة 

الشعر بيتأذى من مجرد غسله بالماية ....

*طيب ليه الشعر بيتأذى من الماية؟

لأن الماية بتدخل بين طبقاته و بتخليه يتمدد أكثر من اللازم مش بيستحمل و يتقطع 

*طيب ازاي أحل المشكلة ديه؟

الحل أنك لازم تعملي حمام زيت قبل غسل الشعر

*ليه المفروض أعمل حمام زيت قبل غسل الشعر؟

لأن جزيئات الزيت بتخترق الشعر و تدخل بين طبقاته .. فأما تيجي تغسلي شعرك الشعر مش هيمتص ماية كتير لأنه اصلا مشبع بجزيئات الزيت ... ده غير ان جزيئات الزيت هتدفع الماية الزيادة للخارج و بالتالي الشعر مش هيتمدد و مش هيتقطع و كده غسله مش هيصبح مشكلة

*هل فيه أنواع معينة من الزيوت يفضل اني استخدمها كحمام زيت ؟

ايوة طبعا.... لازم تختاري الزيوت اللي جزيئاتها صغيرة و تقدر تخترق الشعر زي زيت الجوزهند و زيت الافوكادو و زيت الزيتون

*سمعت ان زيت الجوزهند بيزود البروتين في الشعر ..الكلام ده صحيح؟

لأ مش صحيح ..زيت الجوزهند بيحافظ على نسبة البروتين الموجودة في الشعر مش بيزودها

*ايه المنتجات الطبيعية اللي هتزود نسبة البروتين في شعري؟

لبن الجوزهند , الأفوكادو , بياض البيض

*أيه المنتجات اللي هتحافظ على نسبة البروتين في شعري ؟

زيت الجوزهند , الحنة , الطمي

*أيه افضل انواع الشامبو المناسبة لشعري؟

الشامبو الخالي من الكبريتات free sulfate 

بس خالي بالك انك طالما هتستخدمي شامبو خالي من السلفات يبقى لازم كل المنتجات اللي هتستخدميها لشعرك تكون خخالية من السيلكون اللي مش بيدوب في الماية

*أزاي اعرف ان السيلكون ده بيدوب في الماية و لا لأ؟

كل الأنواع ديه بتدوب في الماية 

اي نوع سيلكون هتلاقي جنبه PEG

dimethicone copolyol

lauryl methicone copolyol

hydrolyzed wheat protein

(hydroxy propyl polysiloxane)

*أيه أفضل المنتجات المناسبة لشعري؟

المنتجات المحتوية على بروتين

*ازاي اعرف أن المنتج اللي بستخدمه لشعري فيه بروتين و لا لأ؟

لو لقيتي من ضمن المكونات بتاع المنتج بتاعك الكلمات دي

1- protein أو keratin أو  collagen  أو  biotin

2- hydrosylates , hydrolysed , hydrolyzed الكلمات ديه معناها ان البروتين مكسر الى قطع أو سلاسل قصيرة 

3- amino acids  و معناها أحماض أمينية و الأحماض الأمينية هي الأساس في بناء البروتينات و فيه شركات كتير بتستخدم كلمات زي  glutamic acids , cysteine , arginine  عشان تعبر عن الاحماض الأمينية 

4- peptides عبارة عن سلاسل تحتوي على احماض أمينية 

5- بياض البيض , البيض الكامل , الموز , الصبار , اللبن , الأفوكادو

*هل نسبة البروتين الموجودة في كل المنتجات واحدة؟

لأ طبعا.. نسبة البروتين بتعتمد على ترتيب وجودها في المنتج 

لو هو موجود في أول 5 مكونات أعرفي ان نسبة البروتين كبيرة و كل أما يبعد نسبته بتقل

*شعري في حالتي ديه محتاج للترطيب؟

ايوة طبعا... الترطيب ضروري عشان يكون الشعر صحي

* أيه أحلى الماسكات الطبيعية اللي جربتيها و فيها نسبة بروتين عالية ؟

ماسك الأفوكادو

طريقته:- هتجيبي ثمرة أفوكادو و موزة تكون مستوية و زيت جوزهند و بيضة و معلقة عسل و معلقة زيت خروع و اضربيهم في الميكسر و عشان ميكونش فيه شوائب صفيه 

حطي الماسك على شعرك و البسي بروكاب لمدة نص ساعة او البسي  شور كاب و استخدمي حرارة السيشوار لمدة ربع ساعة و بعدين سيبي الماسك على شعرك ساعة و ادخلي اغسلي شعرك كالمعتاد 

يفضل تعملي الماسك ده مرة كل اسبوعين

*بعد اما استخدم المنتجات اللي فيها بروتين و التقصف يتعالج كده شعري مش هيكون محتاج بروتين تاني ؟

للأسف لأ .. هيكون محتاج بروتين كل فترة و فيه خبر تاني سئ

مفعول منتجات البروتين مؤقت مش دايم 

*طيب الحل ايه عشان احافظ على نسبة البروتين اللي في شعري و مرجعش تاني افقد البروتين ؟

الحل في ال  ceramides

* ايه هي السيراميدات  ceramides؟

السيراميدات هي دهون طبيعية بتكون موجودة في طبقات الشعر الداخلية 

فايدتها .. انها بتخلي طبقات الشعر متماسكة و مترابطة مع بعض مش بس كده و بس لأ و بتمنع تسرب أي ترطيب من الشعر و كمان بتجذب الترطيب للشعر عشان كده لو نسبة السيراميدات في شعرنا كويسة الشعر بيكون صحي و بتحافظ على ملمس الشعر ناعم 

* ايه هي المكونات اللي لما اشوفها اعرف ان المنتجات بتاعتي فيها سيراميدات ؟

1- 3 octadecamedio

2- oleamido

* انا المنتجات بتاعتي مفيهاش سيراميدات ... ايه الحل ؟

فيه زيوت فيها نسبة عالية من السيراميدات اشهرها

زيت الذرة , زيت بذور العنب , زيت دوار الشمس , زيت جنين القمح 

**انا كده قولتلكم الخطوات الأساسية اللي هتمشوا عليها 

ناقص اقولكم ازاي تتعاملي مع كل حالة تقصف من حالات نقص البروتين

1- لو التقصف عندك بسيط بتعالجيه انك تستخدمي ماسك فيه بروتين و ممكن يتعالج من استخدام الماسك مرة واحدة

2- لو التقصف عندك متوسط استخدمي مرطب يومي فيه بروتين

3- لو التقصف متوسط الى شديد استخدمي ماسك المايونيز لمدة 30 دقيقة

4- لو واصلة لمرحلة خطيرة في التقصف يبقى الحل في ماسكات البروتين المركزة

ملحوظة .... اخر نوع من الماسكات البروتين المركزة لسه مشوفتوش في مصر 

كده موضوع التقصف خلص عارفة انه ممكن يكون غلس و تقيل بس انا حبيت تشوفوا المشكلة بطريقة مختلفة 

اي استفسار او كومنت انا معاكم