My daily & weekly shower routine روتين الشور اليومي و الاسبوعي

ازيكم يا بنات النهاردة هقولكم تفاصيل الشور اليومي و الاسبوعي بتاعي 

الروتين ده انا مستمرة عليه من سنين و لو كنتوا من متابعيني على الفيس بوك هتلاقوا اني اتكلمت عنه من اكتر من سنتين 

بصراحة الروتين ده ساعدني كتير ان جسمي يبان بشكل صحي اكتر 

الاول هقولكم على النتايج اللي لاحظتها من استمراري على الروتين بتاعي 

1-تخلصت من جفاف الجلد نهائيا

2-تخلصت من الشعر اللي بيكون تحت الجلد 

3- جسمي اصبح موحد و تخلصت من اي اثار للحبوب مفيش غمقان في الركبة او الكوع 

4-سيطرت على مشكلة السليوليت

5-الاسترتش ماركس (علامات تمدد الجلد) قلت بنسبة كبيرة جدا

نييجي بقى لخطوات روتين شوري اليومي  و الاسبوعي

1-dry brushing

ال dry brushing هو تديلك الجسم بفرشاة و هو جاف بحركات دائرية من اسفل لأعلى بحركات دائرية 

فايدته....

بيساعد على تنشيط الدورة الدموية 

بيخلصك من الجلد الميت 

بيخلصك من الشعر تحت الجلد 

ليه دور اساسي في حل مشكلة السليوليت

الخطوة ديه بتاخد من 3 الى 5 دقائق

بالنسبة ليه بستخدم فرشاة مخصوص لل dry brushing ممكن تستبدليها باللوفة المصري بتاعتنا ممكن تخصصي قطعة للموضوع ده بس و باردو نفس طريقة استخدام الفرشاة

2- تقفي تحت الماية الساخنة لمدة 5 الى 10 دقائق

الخطوة ديه هتساعد ان جلد جسمك يطرى و هيساعدك انك تتخلصي من الجلد الميت بسهولة

3-نشفي جسمك من الماية اللي عليه مش لازم تجفيف تمام 

4- استخدمي الاسكراب أو المقشر بتاعك 

يعني ايه  scrub او مقشر

الاسكراب او المقشر هو كريم او شورجل او ميلك فيه حبيبات صغيرة بتساعدك انك تتخلصي من الجلد الميت و بالتالي بتساعد الجسم يبقى ناعم و طالما بتتخلصي من الجلد الميت يبقى هيحصل تجديد للجلد و بالتالي جلد جسمك هيبقى افتح و صحي اكتر 

بالنسبة ليه المقشر اللي بستخدمه هو اسكراب القهوة اللي اتكلمت عنه قبل كده لو الاسكراب ده مش موجود لأي سبب بستخدم اسكراب st.ives blemish control 

انا عارفة ان الاسكراب ده بتستخدموه للبشرة لكن انا بالنسبة ليه جربته اكتر من مرة و كل مرة بستخدمه بصحى من النوم الاقي بشرتي ملتهبة و فيها حبوب عشان كده بقيت استخدمه لجسمي 

طريقتي في استخدام الاسكراب بوزعه على جسمي بحركات دائرية من اسفل لأعلى و بعدين بسيبه 5 دقائق 

5- البس جوانتي التقشير و اوقات كتير استخدم ايدي و ابدأ ادلك جسمي كله 

6-اشطف جسمي من الاسكراب 

7- استخدم الشور جل بتاعي (الاستخدام اليومي) او الصابونة الافريقية african black soap ( في الايام اللي بستخدم فيها الاسكراب)

في الفترة اللي فاتت كنت مركزة مع نوعين 

النوع الاول

st.ives indulgent coconut milk triple butters 

مناسب جدا للناس اللي عندها حساسية زيي 

بتحسي بشئ من الترطيب بعد استخدامه

ريحته مش بتثبت على الجسم

النوع التاني

soap & glory clean on me 

مش مناسب للناس اللي عندها حساسية (في اليوم اللي بستخدمه لازم اخد قرص الحساسية) 

كتنظيف و ترطيب كويس 

رايحته ثابتة 

بالنسبة للصابونة الافريقية بستخدمها في الايام اللي بعمل فيها اسكراب بستخدم نوع اسمه Nubian heritage 

فايدتها انها بتساعد على ازالة الجلد الميت بصورة اكبر 

الطريقة بستخدمها زي الشورجل و لكن بسيبها كام دقيقة و اثناء شطف جسمي بفرك جسمي بايدي بلاقي جلد ميت بينزل

بالنسبة لل sensitive area  بستخدم غسول جولد او غسول سيتيال

8-نشفي جسمك بعد الشور

9-التونر (خطوة ممكن تستغني عنها)

عارفة ان فيه ناس كتير هتسأل هو احنا بنستخدم لجسمنا تونر ؟

بصراحة ديه خطوة انا مدخلاها على روتين جسمي من فترة و هي خطوة غير مكلفة لكن نتيجتها كويسة من حيث التفتيح و مشاكل الحبوب و ان الجلد يبان مشدود و صحي 

التونر هو عبارة عن منقوع مر البطارخ 

الطريقة بتاخدي معلقة مر و بتصبي عليهم كوبيتين ماية مغلية و بتسيبيهم لتاني يوم لحد اما المر يدوب و بعدين تصفيه في بخاخة و بتضيفي عليه كوب ماء ورد 

التونر ده بيكفي مدة من اسبوعين ل تلاتة بستخدمه لكل جسمي و اقصد كل جسمي فعلا الاندر ارمز و المنطقة الحساسة بعد فترة بتلاحظي فعلا نتيجة كويسة بالنسبة للحبوب و اثارها خصوصا حبوب المؤخرة و شد ملحوظ في الجلد و طبعا تفتيح 

البديل للتونر ده تونر اسمه ماء الورد بالمره (من الكويت شوب)

10-الترطيب 

خطوة اساسية مينفعش نستغنى عنها 

رطبي جسمك بأي مرطب يعجبك سواء لوشن او كريم او بتر او اويل ....المهم لازم ترطبي و ده هيساعدك ان جسمك يفضل ناعم و ان جسمك يفضل موحد و ميحصلش غمقان في ركبتك او كوعك (بفضل في اليوم اللي بتستخدمي فيه الاسكراب تستخدمي اويل طبيعي)

بالنسبة للمرطبات اللي استخدمتها الفترة اللي فاتت

المرطب الاول..........

St.ives skin renewing collagen elastin

ترطيبه كويس 

ريحة هادية جدا و لكن ثابتة

ساهم بنسبة بسيطة في تقليل الاسترتش ماركس 

مناسب للناس اللي عندها حساسية

المرطب التاني........

SOAP & GLORY the righteous butter body

ترطيب كويس

ريحته تقيلة نفاذة ثابتة جدا لدرجة انها بتثبت في اللبس و بتستمر لأكتر من يومين 

غير مناسب للناس اللي عندها حساسية (باردو لازم اخد دواء الحساسية بتاعي في اليوم اللي بستخدمه)

المرطب التالت ( هو ده نجم موضوعي النهاردة)

APRICOT OIL 

زيت المشمش 

من احلى الزيوت اللي ممكن تستخدميها على الاطلاق سواء لشعرك او لبشرتك او جسمك

الزيت غني بفيتامين e , a  بيساعدوا جدا في ترطيب الجسم و تقليل علامات تقدم العمر

الزيت غني بالاحماض الدهنية زي gamma linoleic acid بيساعد على شد الجلد و توحيد لون الجسم 

الزيت شبيه جدا بالمحتوى الدهني للجلد فبالتالي اما المحتوى ده يقل و يبدأ الجلد يجف ممكن استخدم زيت المشمش عشان يعوض النقص اللي عندي و يرجع جلدي لطبيعته 

الزيت مناسب في علاج الاكزيما و تهيج الجلد لانه يحتوي على خواص مضادة للألتهاب

الزيت بيفتح الجسم و بيساعد على ازالة اثار الحبوب 

لو استخدمتيه لبشرتك بيساهم انه يخلصك من الرؤوس السوداء لانه مش بيسد المسام 

الزيت بيساعد الجلد انه يستعيد مرونته و تقليل التجاعيد 

لو في يوم اخدتي شور و حابة تستخدمي منتج واحد بعد الشور لترطيب جسمك و بشرتك و شعرك انصحك بشدة تستخدمي زيت المشمش لانه فعلا هيعجبك 

بالنسبة لترطيب المنطقة الحساسة بستخدم بانثينول سعره كويس و ترطيب كويس لل sensitive area (لازم يوميا ترطبي المنطقة الحساسة عشان مش يحصل غمقان لأن سبب اساسي من اسباب غمقان المنطقة ديه هو عدم الترطيب)

11- التعطير 

خطوة بعملها من سنين اني قبل اما ادخل اخد شور بنص ساعة او ساعة احط من البرفان بتاعي على ضهر اللبس و اطبقه و احطه في درج من ادراج الدولاب و قبل اما ادخل اخد شور اطلعه 

الطريقة ديه بتخلي ريحة الرفيوم ثابتة فترة اطول في اللبس 

بالنسبة للبرفيم اللي كنت بستخدمه الفترة اللي فاتت la vie est belle  من لانكوم حلوة جدا بالنسبة للناس اللي بتحب الروائح الهادية الفلوري على فرويتس ربنا يكرمها حبيبتي اللي عرفتني بيها 

بالنسبة للاندر ارمز بستخدم secret  حاليا هي كويسة لكن اللي بحبه اكتر المسك الابيض من عبد الصمد القرشي بحب استخدمه للاندر ارمز واحط نقطة في البانتي 

ديه كده خطوات الشور بتاعي من ال أ : ي

فيه بس كام ملحوظة مهمة 

1- الخطوات من 2 : 6 بعملهم مرتين في الاسبوع 

لو انتي مش عندك سيلوليت او استرتش ماركس انصحك كفاية مرة واحدة 

لكن لو انتي عندك سليوليت او استرتش ماركس من مرتين الى 3 مرات مناسب جدا 

2- كل المنتجات اللي بتستخدميها في روتين الشور بتاعك خليها في الحمام عشان متكسليش تستخدمي منتج 

3- الاسكراب و الترطيب اهم خطوتين في روتين شورك لان التقشير هيساعد في التخلص من الجلد الميت و تجديد خلايا الجسم 

الترطيب هيكون سبب انك متوقعيش في مشاكل كتير انتي في غنى عنها زي الجسم الغير موحد و جفاف الجلد و الاسترتش ماركس

4- متلزميش نفسك بمنتجات معينة ( المنتجات اللي هنا مجرد منتجات جربتها و بقولكم رأيي فيها)

5- لو تحبوا انصحكم بمنتجين من كل المنتجات اللي كلمتكم عنها هنصحكم بشدة تجربوا اسكراب القهوة و زيت المشمش ( هتدمنوهم)

كده الروتين بتاعي خلص عارفة انه طويل لكن نتايجه فعلا رائعة 

اي استفسار انا معاكم