بديل اسكراب فرانك DIY Frank Scrub

النهاردة حابة اعرفكم على احسن اسكراب استخدمته لجسمي تقريبا بستخدمه من حوالي سنة و نتيجته رائعة و تكلفته رخيصة و يعتبر بديل كويس جدا لأسكراب فرانك و الحمدلله كل صحباتي و قرايبي اللي جربوه عجبهم جدا 

كلنا اكيد سمع عن اسكراب فرانك و انه منتشر من فترة كبيرة و معظم الريفيوهات بتشكر فيه جدا

انا من حوالي 3 سنين استخدمت اسكراب FRANK 

 استخدمت منه نوعين نوع الاورجينال و نوع تاني بالجوزهند و بصراحة هو كويس جدا لكن سعره عالي بالنسبة انه اسكراب 

من سنة تقريبا بدأت استخدم الاسكراب بتاعي اللي هقولكم على مكوناته بس حابة قبل ما اتكلم عن مكونات الاسكراب و فايدة كل مكون فيهم اقولكم على النتايج اللي وصلتلها من الاسكراب ده

1- تخلصت نهائيا من الشعر تحت الجلد 

2- لون جسمي كله موحد 

3- ساهم اني أتخلص من السيلوليت (ساعدني في ده روتين خاص بجسمي هكلمكم عنه قريب)

4- ساهم اني اتخلص بنسبة 70% من الاسترتش ماركس (علامات تمدد الجلد)

5-شكل جلد الجسم اصبح صحي

6- الجسم دايما فيه جلو حلو و ده طبعا يدل على ان الجلد صحي

7- تخلصت من جفاف جسمي و الجلد شكله مترطب على طول

نيجي بقى لمكونات الاسكراب بتاعي 💖💖

1-ملح اليوكو

ملح اليوكو ممتاز في ازالة خلايا الجلد الميت لكن مشكلته بالنسبة ليه انه حامي على الجسم و فيه ناس بتتحسس منه (الطريقة ديه حلت مشكلة انه حامي و خلته اهدى كتير على الجسم )

2-السكر البني (يمكن استبداله بالسكر الابيض) محتاجين من 10 الى 15 معلقة

السكر غني بالجليكوليك اسيد ( alpha-hydroxy ) و طبعا كلناعارفين اننا دايما بندور على منتجات فيها الجليكوليك اسيد لانها بتساعد على تقشير البشرة و تفتيح لون الجلد و التخلص من علامات تقدم العمر 

طيب ايه اللي يميز السكر البني عن السكر الابيض العادي ان حبيباته اصغر فبتساعد على تقشير اعمق للجلد و بالتالي تجديد اسرع للجلد 

السكر كمان بيساعد انه يخلصك من البقع اللي بتكون ناتجة عن الحبوب و تفتيح الركبة و الكوع 

3-زيت جوزالهند (يمكن استبداله بزيت اللوز الحلو او زيت الزيتون او زيت بذور العنب)

انا جربت زيوت كتير في الاسكراب ده لكن اكتر نوع بحبه هو زيت جوزالهند 

مرطب ممتاز لأنه غني بمضادات الاكسدة زي فيتامين e و غني بالاحماض الدهنية زي  lauric , capric , caprylic acid اللي بتخليه مضاد ممتازللألتهابات و الفطريات غني بالبروتينات اللي بتساعد على اعادة بناء الخلايا التالفة زيت جوزالهند بيساعد على تفتيح الجلد و التخلص من علامات تقدم العمر بالنسبة ليه مساهم جيد للتخلص من الاسترتش ماركس (علامات تمدد الجلد)من الاخر الزيت ده فعلا رااائع 
ممكن تضيفي زبدة شيا او زبدة كوكوا الاتنين ممتازين للتخلص من الاسترتش ماركس

4-البن (هو ده نجم الاسكراب ) تقريبا بتاخدي 10 معالق و عشان اكون محددة اكتر انا بجيب 1/8 كيلو بقسمه على مرتين 

طبعا البن غني بالكفايين و مضادات الاكسدة اما بتستخدميه في اسكراب  بيساعد على تنشيط الدورة الدموية و بالتالي بيساعد على التخلص من السيلوليت وبيساعد على تجديد خلايا البشرة و بكده  بيساعد على التخلص من علامات تمدد الجلد 

5_زيت الروزماري بتاخديه منه تقريبا 20 نقطة (بمعنى ادق لكل معلقة زيت جوزهند بتاخدي نقطتين زيت روزماري) 

زيت الروزماري زيت اساسي بيساعد على تنشيط الدورة الدموية و بالتالي بيساهم انك تتخلصي من السيلوليت و الاسترتش ماركس 

ممكن تستغني عنه لو انتي مش عندك مشكلة في الاسترتش ماركس او السيلوليت 

ديه كده مكونات الاسكراب الاول بتضيفي كل المكونات الجافة مع بعض و بعد كده بتضيفي الزيت 

الاسكراب ده بستخدمه لجسمي من مرة الى مرتين اسبوعيا بعد اما اكون عرضت جسمي مدة 5 دقائق للماية الساخنة 

روتين الشور اليومي و الاسبوعي هنزله قريب و اي استفسارانا معاكم